Koning Hiskia het baie siek geword. Die profeet Jesaja het na hom toe gekom met ’n boodskap van die Here. Hy het gesê: “So sê die Here: Maak jou huis reg, want jy gaan sterf.”
Toe draai Hiskia sy gesig na die muur en bid tot die Here. Hy het gehuil en gepleit dat die Here hom moet onthou.
Voordat Jesaja nog uit die middelste voorhof van die paleis was, het die woord van die Here weer na hom gekom. Die Here het gesê:
“Gaan terug en sê vir Hiskia: Ek het jou gebed gehoor en jou trane gesien. Ek sal jou gesond maak. Op die derde dag sal jy opgaan na die huis van die Here. Ek sal vyftien jaar by jou lewe voeg en jou en hierdie stad red uit die hand van die koning van Assirië.”
Jesaja het toe gesê dat hulle ‘n vyekoek moet neem en dit op die seerplek moet sit. Hulle het dit gedoen en Hiskia het gesond geword.
Die Here het ook ’n teken gegee. Die skaduwee op die sonwyser het tien grade teruggegaan, sodat Hiskia kon weet dat die Here sy woord sal waar maak.
Later het manne uit Babel gekom omdat hulle gehoor het dat Hiskia siek was en weer gesond geword het. Hiskia het hulle alles gewys wat in sy skatkamers was: silwer, goud, speserye, olie en al sy wapens. Daar was niks in sy paleis of in sy hele koninkryk wat hy nie vir hulle gewys het nie.
Toe het Jesaja na hom gekom en gesê: “Die dae kom wanneer alles wat in jou huis is en wat jou vaders versamel het, na Babel weggevoer sal word. Niks sal oorbly nie. Selfs van jou seuns sal geneem word om in die paleis van die koning van Babel te dien.” Toe sê Hiskia dat die woord van die Here goed is, want hy het gedink: daar sal vrede en veiligheid wees solank dit nie in my tyd gebeur nie.
Terugkeer 