Naäman was die bevelvoerder van die leër van die koning van Aram. Hy was ’n belangrike en dapper man, maar hy het melaatsheid gehad.
’n Jong dogtertjie uit Israel, wat as diensmeisie in Naäman se huis gewerk het, het vir haar meesteres gesê:
“Ag, as my heer net by die profeet in Samaria kon uitkom, dan sou hy gesond word.”
Die koning van Aram het Naäman na die koning van Israel gestuur met ’n brief en geskenke. Die koning van Israel het die brief gelees en baie ontsteld geraak. Hy het gesê:
“Is ek God, dat ek iemand gesond kan maak?”
Toe Elisa, die man van God, daarvan hoor, het hy gesê:
“Laat die man na my toe kom, dan sal hy weet dat daar ’n profeet in Israel is.”
Naäman het met sy perde en wa by Elisa se huis stilgehou. Elisa het nie self uitgekom nie, maar ’n boodskapper gestuur wat gesê het:
“Gaan was jou sewe keer in die Jordaanrivier, dan sal jy gesond word.”
Naäman het kwaad geword en weggegaan. Hy het gesê:
“Ek het gedink hy sal self uitkom en die Naam van die Here aanroep. Is die riviere van Aram nie beter as al die waters van Israel nie?”
Maar sy dienaars het met hom gepraat en gesê:
“As die profeet iets moeiliks van u gevra het, sou u dit nie gedoen het nie?
Hoeveel te meer noudat hy net gesê het: ‘Gaan was en word gesond.’”
Toe het Naäman afgegaan en hom sewe keer in die Jordaan gewas, soos die man van God gesê het. Sy liggaam het gesond geword, soos dié van ’n jong seun.
Naäman het teruggegaan na Elisa en gesê:
“Nou weet ek dat daar geen God op die hele aarde is nie, behalwe in Israel.”
Terugkeer 