Simson het eendag in die dorp Timna ’n Filistynse meisie gesien. Hy het vir sy pa en ma gesê:
“Ek wil met haar trou.”
Hulle het gevra:
“Is daar nie iemand van ons eie volk nie?”
Maar Simson het gesê:
“Ek wil juis met háár trou.”
Toe Simson weer na Timna toe stap, het ’n leeu op hom afgestorm. Die Gees van die Here het oor hom gekom, en Simson het die leeu met sy eie hande doodgemaak. Later het hy weer daar verbygeloop en gesien daar is heuning in die dooie leeu se karkas. Hy het daarvan geëet.
By die troue het Simson vir die Filistyne ’n raaisel gegee:
“Uit die een wat eet, kom iets om te eet. Uit die sterk een, kom iets soets.”
Hulle kon dit nie oplos nie. Toe het hulle vir Simson se vrou gesê sy moes die antwoord by hom uitvind. Sy het hom elke dag gesoebat, en hy het uiteindelik vir haar van die leeu en die heuning vertel. Toe het sy dit vir die ander gesê, en so het hulle die weddenskap gewen.
Simson was kwaad. Hy het dertig mans in ’n ander dorp verslaan en hulle klere gevat om die weddenskap na te kom. Later, toe hy weer na sy vrou gaan, het sy skoonpa sy vrou aan iemand anders gegee.
Simson het toe driehonderd jakkalse gevang, brandende fakkels aan hulle sterte gebind en hulle deur die Filistyne se lande laat hardloop. So het hy die lande aan die brand gesteek en al die oeste het afgebrand.
Die Filistyne was woedend en wou vir Simson vang, maar die Gees van die Here het weer oor hom gekom en hom baie sterk gemaak. Hy het ’n donkiekakebeen gevat en ’n duisend mans verslaan.
Terugkeer 