Josua het al die stamme van Israel by Sigem bymekaar laat kom. Hy het met hulle gepraat oor God se groot dade:
“Die Here het julle voorvaders uit Egipte verlos. Hy het julle deur die woestyn gelei en die Jordaan laat oopkloof. Hy het julle vyande verslaan en julle ‘n nuwe land gegee.
Nou moet julle kies wie julle gaan dien: die gode wat julle voorvaders gedien het, of die Here.
Ek en my gesin sal die Here dien!”
Die mense het geantwoord: “Ons sal ook die Here dien! Hy het ons uit Egipte bevry en groot wonders gedoen.”
Josua het hulle gewaarsku: “God is heilig. As julle Hom verlaat, sal Hy julle straf.”
Josua het gesê: “Julle is getuies dat julle die Here gekies het om Hom te dien.” Hulle het geantwoord: “Ja, ons is getuies!” Josua het toe gesê: “Gooi dan al die ander gode weg en draai julle harte na die Here, die God van Israel.” Die volk het belowe: “Ons sal die Here, ons God, dien en na Hom luister.”
Josua het ‘n verbond met hulle gemaak. Hy het ‘n groot klip regop gesit as ‘n teken van hierdie belofte. As hulle die klip sien sou hulle dink aan hulle belofte om God te dien.
Daarna het Josua elkeen huis toe gestuur. Nie lank daarna nie het hy gesterf. Hy was 110 jaar oud toe hy dood is en is op sy eie grond begrawe.
Terugkeer 