Jakob het 12 seuns gehad, en een van hulle was Josef. Josef was Jakob se seun by Ragel, en hy was vir hom liewer as vir sy ander seuns. Hy het hom voorgetrek en vir hom ‘n pragtige kleurvolle jas gemaak.
Josef se broers was baie jaloers op hom omdat hul pa vir Josef voorgetrek het. Dit het hulle baie kwaad gemaak.
Een nag het Josef ‘n droom gehad. Hy het vir sy broers en pa gesê: “Ek het gedroom ons was besig om graan te bind. My bondel het regop gestaan, en julle s’n het om my bondel kom staan en voor myne gebuig.”
Josef se broers was nog kwater toe hulle dit hoor. Hulle het gesê: “Dink jy regtig jy gaan oor ons regeer?”
Josef het later nog ‘n droom gehad en dit ook vir hulle vertel: “Ek het gedroom die son, die maan en elf sterre het voor my gebuig.” Dit was selfs vir Jakob te erg en hy het vir Josef gevra of hy dink sy ma en pa gaan voor hom buig?
Al die drome was God se manier om vir Josef die toekoms te wys. Hy sou jare later daaraan terugdink en besef dat God al die tyd ‘n plan met sy lewe gehad het.
Terugkeer 